Unge talent og japansk solstråle er gjester i konsert.

Blir ei flott musikkstund i Helgheim søndag kl.17.

For ein månad sidan var det allsongen som var i fokus då Uskedal Musikklag hadde eit veldig kjekt arrangement på fastelavnsøndag. Komande søndag blir det igjen veldig kjekt i ungdomshuset Helgheim. Nok ein gong er musikklaget arrangør, og denne gongen skal instrumentalmusikken fløyma. I fokus denne dagen er 5 svært talentfulle uskedalsungdommar som endeleg skal få visa kva dei kan i heimbygda. Dei musiserer på ein framfrå måte på piano og messinginstrument. Saman med dei er også pianolæraren deira Yuko Shuto, opphaveleg frå Japan, gjest. I tillegg til å vera ein god pedagog er ho også ein utøvar av ein klasse som vi sjeldan opplever i Kvinnherad.

Idèen til denne konserten kom opp etter å ha vore publikum på kulturskulekonsertar. Desse ungdommane heva heilt klart nivået på desse konsertane, men sidan det er slutt på kulturskulekonsertar i Uskedalen, er det altfor få sambygdingar som får oppleva kor flinke dei er. Dermed blei resultatet arrangementet komande søndag kl. 17.
Etter at arangørane i musikklaget har vore oppvarmingsband med ei lita avdeling med publikumsvennleg musikk, blir det klart for hovudaktørane.
Som perler på ei snor vil publikum få oppleva dei 5 dyktige ungdommane før stjerna Yuko Shuto avsluttar ettermiddagsstunda. Vi trur, ja vi veit, at det blir ei særdeles flott oppleving:

• Anna Hermann Fossli – speler både kornett og piano.
• Martine Myklebust – piano
• Vilde Helgesen – piano
• Erle Marie Korsvold – trombone
• Ebba Hermann Fossli – kornett

Messingblåsarane blir akkompagnert av Yuko Shuto på piano.

Musikkstunda blir avslutta med at Yuko Shuto framfører eit par nummer frå pianoet. Kvinnherad Kulturskule gjorde eit varp då dei tilsette henne for ein del år sidan. I tillegg til å vera ein særs dyktig pedagog med eit vesen som gjer at elevane gler seg til pianotimane, er ho også ein super utøvar. Det er heilt naturleg å omtala henne som “solstråla frå Japan”. Ho har opptredd i Uskedalen ein gong før, på kyrkjekonsert første året ho var her.

Midt i programmet blir det servering av skillingsbollar frå Baker Brun, kaker, saft og kaffi. Serveringa er gratis. Det er også gratis inngang, men i musikkpausen blir det ein omgang med åresalg. Det er allereie mange fine åregevinstar, men viss nokon vil gje gevinstar, er musikklaget svært takksame for det. Det er berre å ta kontakt med ein av medlemmene, eller ta med i Helgheim på søndag.

Publikum kan glede seg denne ettermiddagstunda i Helgheim. Vi i musikklaget gler oss veldig og er svært fornøgde med at vi har fått det til!!

Tekst, foto og nett: Thor Inge Døssland