![](https://uskedalen.no/content/uploads/2021/08/Julekonsert-2-1000x715.jpg)
Røysterett for Alle startar øvingane i morgon, torsdag 26. august kl. 19.00 i Helgheim.
Etter snart eit års pause startar Røysterett for Alle ny sesong med frammøte til fyrste øving i morgon, torsdag 26. august kl. 19.00 i Helgheim. Styret tek omsyn til Covid 19 situasjonen ved å dela koret i to grupper på tvers av stemmene. Øvingane framover vert difor kl. 19.00 og kl. 20.25. Styreleiar Lars Henrik Skogtun helsar nye medlemer velkomne. Nye songarar møter kl. 19.00.
![](https://uskedalen.no/content/uploads/2021/08/Maria-Malmsten.jpg)
Maria Malmsten er musikalsk leiar, ei oppgåve ho har hatt sidan 2006. Ingen dirigent før henne kan syna til så lang tenestetid i Røysterett for Alle. Maria er songpedagog og har lang erfaring som musikalsk leiar i ulike kor og songgrupper. Ho er også dirigent for Husnes Blandakor, noko som gjer det praktisk med eit musikalsk samarbeid på tvers av bygdegrensene. I tillegg er leiar for vokalensemblet GLIMRAH. Maria er dramalærar i Kvinnherad kulturskule.
Røysterett for Alle, medlem i Korforbundet, rettar seg etter nasjonale retningsliner for kordrift i ei tid med pandemi. Det gjeld både på øvingar og ved framføring. På repetoaret står mellom anna nytt stoff. Noko av dette er songar ein nett var bygja på ved nedstenging i fjor haust.
Røysterett for Alle har eit medlemstal på heile 30 personar.
Tekst/ nett: Kristian Bringedal Foto: Arkivfoto