Kvinnhersminne nr. 22 med tema Utvandring er klar for sal og utlevering til medlemene.

Nr. 22 av Kvinnhesminne er klar for distribusjon og sal. Medlemene i Kvinnherad Sogelag får hefte levert på døra. Hovudtema er Utvandring med ein lengre artikkel skriven av Torkel Stensletten frå Uskedalen. Artikkelen med tittelen Nokre særmerke i utvandringa frå Kvinnherad har mellom anna med bilete og skildring av utvandringa frå bruk 14 på Myklebust.

Frode Sæbø har skrive to artiklar i årets sogeskrift, om Kroseen på Larstø og På brislingfiske med Røysaskøyto. Frode er frå Sæbøvik, bur i dag i Uskedalen.

I samtale med Steinar Kroka skriv Audun Eik om det å veksa opp på Kroka, ein veglaus gard i Mauranger. Steinar fortel godt og han er innom mange tema, slik som stølsliv, kraftutbygging, handel, veg, telefon, skule og mangt anna frå dagleglivet på Kroka.

Nokre kortare artiklar tek fram sumt frå krigen. Noko av det er nytt stoff for mange. Dette gjeld mellom anna ordførar Traavik sin rapport til innanriksdepartementet frå krigshendingane i Uskedalen aprildagane 1940. Bonde Amund T. Myklebust er kjelde.

Lars Jostein Rørvik har vore skriftstyrar i seks år. No takkar han for seg. Nye krefter må føra arbeidet vidare.

Kvinnherasminne XXII er på vel 100 sider. Formgjevar er Åslaug Snilstveit i Salikat. Trykk: LOS digital.

Tekst/nett: Kristian Bringedal
Foto: Faksimile framsida/ arkivfoto