Færre julebukkar dei to siste åra - årsaka er truleg pandemien.

Å gå julebukk er ein tradisjon vi kjenner like tilbake til mellomalderen der folk kledde seg ut som ein trugande person som skremde borna. I vår tid er å gå julebukk langt meir morosam og underhaldande. Julebukktradisjonen i dag er at born kler seg ut, går frå hus til hus for å få godteri i posen. Som takk syng dei ofte ein julesong. Dei to siste åra har det vore langt færre julebukkar. Årsaka er truleg pandemien og at foreldra set grenser for aktiviteten.

I media har det i år vore sprikande og uklare signal om det å gå julebukk. På Facebook registrerer vi ulike synspunkt frå kommune til kommune, Kommunelegen i Ullensvang opna opp for julebukkane. I Kvinnherad vart det heller ikkje sagt nei. I Fitjar seier foreldreutvalet på skulen at det må vera noko foreldra avgjer.

Uskedalen.no kjenner til at det var julebukkar på dørane på øvre Musland, på Neset og i Korsnes.

Kor som er: Det var gildt å få julebukkane på døra. Tradisjonen overlever og julebukkane er sikkert tilbake i si fulle breidde til neste år.

Tekst/nett: Kristian Bringedal
Foto: Kristian Bringedal/ Møyfrid Kristoffersen