Plastdugnad i år også. Ver med og ten pengar.
Plastdugnaden er open, bli med og ten pengar til laget
Frivillege lag, organisasjonar og FAU ved skular i Kvinnherad kan igjen kombinera dugnadsinnsats med miljøarbeid. Plastdugnaden er open for nye søknader, og gjennom ordninga kan ein få støtte for å rydda plast og søppel i nærmiljøet. Norn og ungom i alderen 6 – 19 år kan delta.
Plastdugnaden er eit samarbeid med Handelens Miljøfond og Kvinnheradstiftinga og gir deltakarane høve til å gjera ein konkret innsats for miljøet, samtidig som dei tener pengar til laget, organisasjonen eller FAU-et.
Midlane ein får gjennom Plastdugnaden er ikkje øyremerkte. Laget eller organisasjonen bestemmer sjølv kva pengane skal brukast til. Dei kan til dømes gå til aktivitetar, utstyr, arrangement, drift eller andre tiltak laget ønskjer å prioritera.
FAU ved skular også kan søkja om å delta i Plastdugnaden.
Ordninga har vore populær, og Kvinnheradstiftinga vonar mange vil nytta høvet også denne hausten.
– Plastdugnaden er ei ordning vi er veldig glade for. Her får vi kombinert frivillig innsats og miljøarbeid, samtidig som laga får inntekter dei sjølve kan bestemma korleis dei vil bruka. No håpar vi både lag, organisasjonar og FAU vil samla gjengen og bli med, seier dagleg leiar Bente Lie Nilsen i Kvinnheradstiftinga.
Plastdugnaden opna igjen 17. august.
Meir informasjon og søknad finn ein på handelensmiljofond.no
Kvinnheradstiftinga oppmodar lag, organisasjonar og FAU til å samla barn og unge til dugnad og bidra til eit reinare nærmiljø, samtidig som dei tener pengar til eigen aktivitet.
Tekst/foto: Pressemelding Nett: Kristian Bringedal