Klargjering til nyopning av bygdemusèet Rødtunet i august.

I går var Kristian Bringedal, Siv og Leif Magne Framnes i gang med vasking og plassering av museumsgjenstandane på Rødtunet. Alt må vera klart til nyopninga av musèet som skjer den 22.august med ei større markering for publikum.
Gjenstandane måtte flyttast vekk under takvøla på hovudhuset som blei utført av brørne Trygve og Jan Øvstebø saman med Jon Sigvald Tjelmeland på oppdrag for kommunen. Tidlegare har Dugnadsgruppa støvsuga både i hovudetasjen og på lemen. Dei har også bygt nytt slåk til kverna og fått den i drift igjen. I tillegg har dei gjort anna restaureringsarbeid.
Kristian Bringedal fortel at dei kom godt i gong med vaskinga og plasseringa av museumsgjenstandane i går. Dei har noko arbeid igjen, men til nyopninga skal alt vera klappa og klart.

Det er Uskedal Historielag som har teke på seg samordninga av opningsarrangementet 22.august, men både grunneigarane Siv Framnes og Atle Thoresen, dugnadsgruppa, Uskedal Helselag, Uskedal Musikklag og kommunen er involvert. Ramma for programmet er klar.
Det blir to hovudpostar. Den nyrestaurerte kverna blir sett i drift og demonstrert for publikum. Hovudattraksjonen blir likevel innslaget med professor Jørn Øyrehagen Sunde. Ferda hans fram mot å bli ein av landets mest kjende historikarar starta nemleg på Rødtunet då han hadde sommarjobb som omvisar for turistar der. Det blir særdeles interessant å høyra han når han kjem tilbake den 22.august.
Elles ligg alt til rette for ein festdag på det vakre bygdetunet. Det blir både korpsmusikk, servering av kaffi og noko å bita i av helselaget i tillegg til aktivitetar for både born og vaksne, og sjølvsagt mulighet til å studera museumssamlinga. Ein skikkeleg familiedag!

Tekst og nett: Thor Inge Døssland
Foto: Siv Framnes