Thomas Eide (INP) med spørsmål til Orføraren. Gjeld Vetlebru og kommunal veg på Kjærlandssida.

Kommunestyremedlem Thomas Eide (INP) frå Uskedalen har fleire spørsmål til Orføraren i møte komande torsdag.

1) Oppfølging etter PTM: Vetle bru (Kv1179) i Uskedalen (BK8)
Dette gjeld Vetle bru over Tverrelva på kommunal veg Kv1179 i Uskedalen, på vegen vidare opp mot Musland. Brua er ei av flaskehalsane som gjer at strekninga i praksis har BK8 / 8 tonn akseltrykk. Dette hindrar lovleg framkome for tyngre køyretøy som landbruk, skogbruk og næringsliv er avhengige av.

Me tok opp dette i PTM for om lag eitt år sidan, og fekk då følgjande svar frå Sektor Teknikk og Miljø v/einingsleiar Veg og park, Terje Natland: «Det er to bruer i Uskedalen som gjer at vegen til Musland har Bk8/32 tonn, 12,40 m
vogntoglengd. Haugland bru – over Uskedalselva, mellom Døssland og Haugland på Fv5038 og Vetle bru – over Tverrelva på Kv1179

Det er teke initiativ frå landbruksnæringa, skogbruk, om utbetring/forsterking av bru på fylkesvegen. Veg og park har fått utarbeidd rapport for Haugland bru på kommunal veg. Rapporten viser at landkar og dragarane på brua ikkje toler høgare belasting enn 8 tonn aksellast.»

Sidan den gong opplever me at lite har skjedd, samstundes som behovet aukar (tyngre køyretøy i landbruket, store mengder tømmer som nærmar seg hogst, og transport knytt til biogassanlegget på Husnes).

Spørsmål:

1. Blir dette arbeid med no og kva konkret oppfølging er gjort det siste året for Vetle bru, Kv1179).
2. Ligg det føre ein plan (utgreiing/tiltak) for oppgradering/forsterking eller utskifting av brua, slik at ein kan få høgare bruklasse og lovleg transport.
3. Dersom det ikkje ligg føre plan: Kva er neste steg, og når kan ein venta ei avklaring om vegen vidare (kostnad/finansiering/framdrift).
4. Kommunen driftar kalkstasjonen i Børsdalselva, og ved kalkleveransar passerer større køyretøy: Kva er praksis for dispensasjon i dag, og kor lenge er det aktuelt å basera seg på dispensasjon framfor ei varig løysing.

2) Kommunal veg på Kjærlandssida – asfalt/standard og mogleg samordning med vassleidning.

Asfalten på den kommunale vegen opp dalen på Kjærlandssida er no i så dårleg forfatning at han framstår som moden for utbetring/oppgradering snarast.

Spørsmål:

1. Har Kvinnherad kommune ein plan for utbetring/asfaltering av denne vegstrekninga – og når kan ein realistisk venta gjennomføring.
2. Uskedal vassverk planlegg å trekkja vassleidning frå Haugland og ned til Uskedalen sentrum, og ein naturleg trasé kan vera i/ved vegområdet. Vil kommunen ta initiativ til dialog med Uskedal vassverk for samordning, slik at ein kan kombinera leidningsarbeid og vegutbetring og unngå dobbel graving og unødige kostnader.

Foto vert lagt på seinare.

Tekst: Thomas Eide
Foto: Arkivfoto
Nett: Kristian Bringedal