Møte på Bedehuset, sundag, kl. 11 med Marit Andresen Røen - " Ei fargerik perle i farta"

“Ei fargerik perle i farta” er tittelen på boka Marit Lindekleiv har skrive om evangelisten Marit Helen Andresen Røen. I morgon, sundag, er ho talar på møte i Uskedal Bedehus. Marit Andresen Røen vert ofte omtalt som Fyrverkeri – evangelisten. Ho er og har vore ein aktiv forkynnar i 50 år. Frå hausten 1977 har ho med nokre avbrot vore tilsett i Samskipnaden, misjonen som var skipa i Uskedalen i 1864.

Marit Andresen Røen er gift med Knut Inge Røen. Han er mellom anna kjend frå konsertane sine med repretoar frå Jim Reeves. Han song sist i Uskedalen, i ei gravferd i mai 2025, saman med sonen sin.

I boka Ei fargerik perle i farta finn vi innslag frå opphald ho har hatt i Uskedalen. Alt i 1983 song ho på teltmøte i Uskedalen. Seinare har ho vore tilbake på Bedehuset mange gonger. Marit har vener i Uskedalen, som ho set av tid til å ta turen innom. I boka les vi om venskap både på Haugland og på Rød.

Mange hugsar Marit i samsong med Liv Rolvsnes, ein duett som reiste på heile Vestlandet som songevangelistar.

I morgon, sundag 16. november, kan du møta og få oppleva Marit Andresen Røen på møte i Bedehuset kl. 11.00.

Tekst/nett: Kristian Bringedal
Foto: Faksimile frå framsida av boka Ei fargerik perle i farta, skriven av Marit Lindekleiv.