Stord Lufthamn 40 år - Jan Morten Myklebust har vore sjef i 30 år.

For å markera at Stord lufthamn i år feirar 40-års jubileum vil lufthamnselskapet laurdag 31. mai arrangera Stord Airshow 2025 på Stord lufthamn – Sørstokken. Under arrangementet vil det vera mogleg for publikum å sjå fly og helikopter av ulike typar, både i lufta og på bakken. Det vert sal av kioskvarer og aktivitetar for dei minste. I lufta vert det akrobatiske oppvisningar frå fleire aktørar.

Frå Sverige kjem to pensjonerte fly frå det Svenske flyvåpenet. Begge flya tilhøyrer i dag Swedish Air Force Historic Flight. Jagarflyet SAAB Viggen, eit ekte jagarfly frå den kalde krigen, vil med sin etterbrennar laga god lyd på lufthamna denne dagen. Flyet har tidlegare vitja lufthamna under Stord Airshow 2018. Lufthamna sin video frå oppvisninga den gong har meir enn 6,4 millionar visningar på YouTube.

I tillegg kjem det eit SAAB SK-60 jet-treningsfly. Flytypen vart fram til i fjor nytta av det svenske luftforsvaret til opplæring av jagarflypilotar. Flygaren som kjem til Stord vann i 2023 pris for «mest presise og elegante flygeoppvisning» med dette flyet, under verdas største militære flystemne, Royal International Air Tattoo i England. Det er venta at publikum på Stord vil få sjå same prisvinnande oppvisning 31. mai.

Fleire deltakarar til arrangementet vil bli annonsert fortløpande på www.stordairshow.no.

I tillegg til flygeoppvisning, vert det høve for publikum til å delta på rundflyging med helikopter og veteranfly. På bakken vert det underhaldning for dei minste. Brannbamsen Bjørnis er invitert, det vert kappløp mellom lufthamna sine to brannbilar på rullebanen, og det vert gratis hoppeslott.

For meir informasjon og kjøp av billetter kan ein vitja www.stordairshow.no eller Stord lufthamn sitt arrangement på Facebook «Stord Airshow 2025».

Tekst/foto: Pressemelding
Nett: Kristian Bringedal