Aktivitetshus, Barn og ungdom, Barnehage og Skule, Kultur, Skulemusikk og Musikklag

Konsert med Sjøforsvarets musikkorps

Onsdag kom Sjøforsvarets musikkorps på besøk til Uskedalen skule og hadde ein flott konsert for alle elevane. Nokre heldige musikantar frå skulemusikken fekk også gleda av å spele i lag med dei.

Styret i skulemusikken sendte for ei tid tilbake inn ei søknad til Sjøforsvarets musikkorps med håp om å få tildelt ein rekrutterings-konsert. Uskedalen var heldige og vart valgt ut, og i dag kom det 8 dyktige musikantar som verkeleg trollbandt publikum i 30 minutt. I salen var det også elevar frå Malmanger, Husnes og Herøysund skule som fekk gleda av dette flotte arrangementet.

På ein underhaldande måte vart alle instrumenta presentert i tur og orden. Og med ein god dose humor og briljering på instrumenta, fekk dei publikum med seg.

På filmen ser vi ein av trombonistane som syner ulike måter å bruka instrumentet på.

Etter fengande toner frå mange av låtene i Flåklypa Grand Prix, avslutta dei konserten med å invitera inn nokre av våre lokale musikantar til å spele i lag med dei på den siste låta “Bæ, bæ, lille lam”.

Musikanter frå Rosendal, Husnes og Uskedal skulemusikk fekk spele i lag med korpset.

Dette var ei flott oppleving og styret håper at fleire barn kjenner at dei får lyst å starta i korps etter denne dagen. Alle nye musikanter er velkomne!

Tekst/nett/foto: Marianne Korsvold