![](https://uskedalen.no/content/uploads/2021/06/20210530_121306-1000x715.jpg)
Børsdalen - eit ukjend turmål for mange.
Børsdalen, som til no har vore eit ukjend turmål, vert oppdaga og teke i bruk av turgåarar. Den 3 km lange V- forma dalen kiler seg inn mellom Englafjell og Ulvanoso og er i liten grad påverka av menneskeleg aktivitet. Difor seier vi at Børsdalen er eit naturminne, forma i hovudsak av elveerosjon og litt av isen då den siste istida var slutt for 10 000 år sidan.
No har nokre ivrige turgåarar teke på seg å merka stien langs elva med steinvardar. Noko brakje er rydda og traseen er godt synleg i landskapet. Børsdalen er på mange måtar som ei villmark og mange, bortsett frå bønder på plassen og dei som går turen frå Holmedal til Uskedalen, har aldri vore her før.
![](https://uskedalen.no/content/uploads/2021/06/20210530_120332-2-1024x614.jpg)
Frå Kalkstasjonen til inst i dalen før Fagerdalen er det om lag 3 km. Med store skredmassar går du for det meste i ur tilvaksen med gras og mose. Ver merksam. Det kan vera snart å trø ned i hol eller bekkefar i det heller ulende terrenget. Landskapet er mektig og imponerande med blankskurte fjellsider, snøfenner i Limomen, store flyttblokker frå istida, fossar og elva i dalbotnen.
![](https://uskedalen.no/content/uploads/2021/06/20210530_132808-2-1024x614.jpg)
Det er to alternativ for tilgang til Børsdalen, anten frå Kalkstasjonen eller frå Heio med tur inn sandtaket på Døssland.
GOD TUR i eit nytt og ukjend landskap.
Tekst/foto/nett: Kristian Bringedal