Søk
 
Kontakt oss
Kontakt uskedalen.no:
Tips til redaksjonen
E-post: uskedalen.no
Kristian Bringedal
Tlf nr:915 31 487
Svein Rimestad
Tlf nr:911 09 868
- - - - - - - - - - - - - - - - - - -
Kontakt Uskedal Utvikling
E-post
- - - - - - - - - - - - - - - - - - -
Bli medlem
Årspriskr 200.-
Kontonr. 1503 39 82329
Last ned giro
VIPPS 512870
- - - - - - - - - - - - - - - - - -
Nettsider frå Uskedalen
Festidalen
Uskedal Idrettslag
Uskedal elveeigarlag
Aktivitetar i Uskedal

Julehelsing frå ordføraren jula 2018.

23.12.2018
Klikk på bilete for full storleik
 
Kjære Kvinnheringar! Julefreden er i ferd med å senka seg, og rundt oss ser vi snø på fjella og stjerner på himmelen.

Det er ei vakker tid vi no går inn i. Ei tid der vi kjem saman med slekt og vener, gler oss over gåver og deler gode måltid. Det er viktig å vera tilstades og nyta augneblinka der vi for ei lita stund legg kvardagen til side.
 
Året 2018 er i ferd med å ebba ut, og vi ser attende på eit år med mange positive hendingar i Kvinnherad. For meg som ordførar har det vore gildt å vera med på opning av store prosjekt, og eg vil trekka fram opninga av det nye Rosendalstunet, Opsangervegen og den nye vegen gjennom Lundsneset. Det er viktig at vegane er trygge å ferdast på, men det er også viktig at det er fint og triveleg rundt oss. Kvinnherad kommune vil i 2019 og i åra som kjem gjera meir for å løfta sentrumsområda og trygga vegane våre. Eit anna viktig prosjekt i det nye året vil vera realisering av ny idrettshall. Dette er eit prosjekt som vil komma heile kommunen til nytte, og eg ser fram mot ei realisering som vil vera særleg positiv for barn og unge.

For ein ordførar er det alltid stas å opna nye vegar og bygg, men det eg synes er aller mest stas med å vera ordførar, er møte med enkeltmenneska. Etter året som har gått sitt eg att med mange fine og sterke inntrykk etter møte med kvinnheringar i alle aldrar. Kvinnheringane er eit gildt og ope folkeslag, og eg vil takka dykk for at eg alltid blir tatt så godt i mot der eg ferdast. Som ordførar får ein vera med på både gleder og sorger, noko som sett djupe spor når eg no sjølv ser attende på året som har gått.

Spesielt inntrykk gjev det å møta menneske med sterkt engasjement for andre. Dette er unikt innan idretten. Hanne Larsen i TRIO er eit engasjert menneske som verkeleg har gjort inntrykk på meg. Saman med fleire andre står ho på, og legg ned tallause timar for barn og unge. Eg vil også trekka fram Svein Åge Vangdal og innsatsen han med fleire legg ned for idrettslaget Strand-Ulv. Arvid Næs er ein institusjon i Rosendalsidretten, og på Halsnøy er idrettslaget med Richard Erlandsen i spissen no i ferd med å reisa eit nytt, flott klubbhus. Valeparken, Erslandsparken og den nye aktivitetsparken i Uskedalen er døme på innsats frå menneske med engasjement for andre. Det er kjekt å sjå korleis aktive idrettslag gir levande bygder.

Det frivillige livet i Kvinnherad er rikt på alle område. Mange kvinnheringar engasjerer seg i tilrettelegging for friluftsliv gjennom Kvinnherad Turlag. Turlaget er ei samlande folkerørsle for heile kommunen, og feira i 2018 sitt 20-årsjubileum. Takk og til alle som gjennom bygdalag og velforeiningar står på og skapar samhald og trivnad i bygdene. Ei varm helsing vil eg senda til alle som arbeider frivillig for eldre både i lokalsamfunnet og på institusjon. Velferdssamfunnet er ikkje berre det offentlege, vi er heilt avhengige av dei frivillige for å kunna gje innbyggarane den velferden dei fortener.

Eg vert bevega når eg møter menneske med utviklingshemming og deira næraste. Dette viser meg at mangfaldet blant oss er noko av det aller beste vi har. I januar vart eg invitert i 50-årsdag til Gro Natvik. Ho bur i bufellesskapen i Kaldanesvegen. Livsgleda og varmen som var i dette selskapet vil eg aldri gløyma, og eg ser attende på dette som eit av mine finaste minne frå 2018.

Fint er det også å vera på besøk på institusjonar der eldre er saman med sine næraste, og eg får sjå korleis familieband er sterke frå dei aller eldste til dei aller yngste. Det er også gledeleg å sjå det gode arbeidet som våre tilsette i omsorgstenestene legg ned for å gje sine pasientar ein god kvardag. I år vil eg trekka fram sjukepleiar Åshild Lygre ved Rosendalstunet, som på eiga fritid tok med seg bebuarar ved sjukeheimen på konsert i Baroniet. Vi er heldige som har slike medarbeidarar i Kvinnherad kommune.

Året 2018 gav mange gledesstunder. Takk til lokale krefter som arrangerer til dømes konsertar, revyar, jubileumsfestar, festivalar og meir til. Vi treng slike opplevingar i kvardagen, og det er av stor verdi for oss alle at nokon stiller opp og skipar til eit høgt tal varierte arrangement. Takk også til alle som stiller opp som publikum. Det er ved å delta vi best kan takka dei som skipar til. Å støtta opp om lokale arrangement ved sjølv å delta er også eit viktig bidrag til at ein kan halda fram med slike. Eit godt døme og fint minne frå 2018 er Pink Floyd-prosjektet som vart arrangert i Kulturhuset Husnes, og som vi no kan gle oss over å få oppleva også neste år.

Juletida kjenner vi som ei tid for hygge og fellesskap. Mange opplever likevel at juletida er ei tid der kjensler som sakn, sorg og einsemd blir forsterka.

Nokon feirar jul der ein av stolane rundt bordet for første gong står tom. Eg tenker denne jula spesielt på dei som har mista sine kjære i ulukker eller kreftsjukdom.

Nokon vil vera einsame av ulike grunnar, og nokon kan oppleva sorg som følge av vanskar med rus eller økonomisk uføre. I denne tida tenker eg særleg på dykk. Eg ynskjer at alle som opplever juletida vanskeleg vil finna håp og trøyst.

Vi lever i ei tid der Kvinnheradsamfunnet er prega av optimisme og framtidstru. Arbeidsløysa er låg, og næringslivet melder om betre tider og gode framtidsutsikter. Dette gjev tryggleik for arbeidsplassar, hus og heim, og det skapar vilje til å satsa på ei framtid i Kvinnherad. Eg vil takka alle som tør å satsa, og som tek risiko for å skapa arbeid til seg sjølv og andre. Nye etableringar bidreg til fleire tilbod for alle som bur her. Dette er med på å skapa levande lokalsamfunn i heile Kvinnherad. Eg håpar 2019 vil bli eit godt år for alle som arbeider og driv næring i Kvinnherad.

Eg vil nytta høvet til å helsa alle som i julehelga er på arbeid og held samfunnet i gong når dei fleste får nyta lange og gode fridagar. Takk for at de stiller opp, slik at alle kan kjenna seg trygge på at helsevesen, beredskap og naudsynte tenester er tilgjengelege gjennom heile juletida.

Når vi no går inn i det nye året, går vi også inn i det siste året av denne valperioden. Eg vil takka for at eg har fått vera dykkar ordførar dei siste åra. Det har vore eit stort privilegium å få vera den øvste tillitsvalde i kommunen, og når veljarane i september neste år skal seia sitt, vil eg uansett utfall av det vera djupt takksam.

Lat oss saman gå inn i julehøgtida med påminning om at lyset som vart tent i Betlehem for over to tusen år sidan alltid vil skina for oss alle.

Eg ynskjer dykk alle ei strålande jul, og eit godt nytt år!


Helsing
Peder Sjo Slettebø
ordførar.
 
Nett:  Thor Inge Døssland
 
 
 
  Tilbake

 
Lesarbilete
Notisar
17.06.2019
Uskedal Trelastlager er seld - meir informasjon i morgon.
Det er i dag gjort kjend at Uskedal Trelastlager er seld. Meir informasjon om salet og den nye eigaren kjem på Uskedalen.no i morgon, tysdag 18. juni.

kb
14.06.2019
Strålande veke for Ingar Kiplesund.
Ingar Kiplesund(22), lengdehoppar og son til Hildegunn frå Haugland, har hatt ei strålande innleiing på sesongen.  Søndag slo han til med pers på 7.94 m i Spania.  Tirsdag fulgte han opp med sterke 7.83 m, og under Bislett Games i går vann han lengdekonkurransen med 7.77 m.  Dette er dei tre beste konkurransane han har levert i karriera så no vert det spennande å sjå om han passerer 8 meters grensa, og også Kristen Fløgstad sin 46 år gamle norgesrekord på 8.02 i nær framtid.

tid
14.06.2019
Støttar Norway Cup-deltaking.
Kvinnherad Energi har tildelt kultur- og idrettstilskot for 2019.  Uskedal idrettslag sitt G15-lag er tildelt 10.000 kroner til deltaking i Norway Cup.  I tillegg får Rosendal Turnlag, der også mange uskedelingar spelar fotball, tildelt 20.000 kroner til deltaking i same arrangement.  Til saman 150.000 kroner vart fordelt på 10 mottakarar.

tid
13.06.2019
Plass til fleire på turen til Arboretet.
Uskedal Helselag sin tur til den botaniske hagen Arboretet på Milde i Fana 20. juni går etter oppsett plan. Det er enno høve til å melda seg på. Alle med interesse for hage, planter og buskar bør nytta seg av dette tilbodet. Guide er Bjørn Moe, med slekt i Uskedalen og med stor kunnskap om planter og treslag. Ein treng ikkje vera medlem i Helselaget for å vera med på turen. Påmelding: Kontakt Eli Roseth Eik. Mobil: 957 86 228. 

kb
13.06.2019
Gretzky BR sprang inn til ein 4. plass på Bjerke.
Veddeløpshesten Gretzky BR fekk ein 4. plass i Tipster Oslo Grand Prix på Bjerke travbane sist sundag. Ein av eigarane er Trude Helen Døssland frå Uskedalen. Kusk var den 22 år gamle Magnus Teien Gundersen. Neste løp er Midtsommartravet på Leangen 22. juni.

kb.
12.06.2019
Wermund Vetrhus - kommuneplanleggjar i Ullensvang herad.
Wermund Vetrhus ( 36 år ) er tilsett som kommuneplanleggjar i det nye Ullensvang herad. Etter kommunesamanslåinga vert Ullensvang utvida til også å omfatta det som i dag er Odda kommune og Jondal kommune.

kb
12.06.2019
Konserten på Stemneplassen er utsett til i august.
Den tillyste konserten på Stemneplassen 18. juni er utsett, truleg til 20. august. Årsaka er mange samanfallande arrangement med både sirkus og banrehagejubileum på den dagen dette var tenkt. Uskedal musikklag har alt lova å vera med. Det vert også andre innslag. leikar og friluftsaktivitetar.

kb
11.06.2019
Kven leiger ut hybel/bolig i sommar ?
Vikarbyrået Nordic Care treng møbelert hybel/leileghet til ein person som skal ha arbeidet sitt i Uskedalen i sommar. Tidsperiode: Frå no og ut veke 33. Ta direkte kontakt med Hege Nordahl på mobil 458 53 582. E post: hege.nordahl@nordiccare.no

Red. 
10.06.2019
Ikkje Cheercamp Uskedalen i år.
Dei siste åra har det blitt arrangert cheercamp i Uskedalen like etter skuleslutt i juni. Denne har blitt svært populær, men i år vert det dessverre ingen camp då instruktørane dessverre ikkje får det til pga flytting og skulegang.  Heldigvis blir det gitt signal om at dei håpar å komme tilbake neste år.

Dette året vert det eit nytt spennande tilbod om lag på same tida.  24.-26.juni vert Basecamp Kvinnherad med hovudvekt på klatring og padling arrangert for første gang. Uskedalen.no kjem tilbake med meir om dette gode tilbodet.

tid
10.06.2019
Uskedal Utvikling - innmelding i Kvinnherad Næringsservice.
Uskedal Utvikling vert med bakgrunn i sak på sist styremøte medlem i Kvinnherad Næringsservice. Tilsvarande organisasjonar som Rosendal Utvikling og Husnes Vekst er alt medlemer. KN vil vera ein samlande paraplyorganisasjon med felles saker for mellom anna sentrums- og næringsutvikling.

kb
Siste Nyhende
19.06.2019
Sokneprest Bjotveit var pådrivaren for å få barnehage i Uskedalen.
Det er truleg ukjend for dei fleste, men det var sokneprest Gunvald Bjotveit, som var pådrivaren i arbeidet med å etablert barnehage i Uskedalen for meir enn 40 år sidan. Uskedal Husmorlag tok opptakten, men mangla økonomi. Soknerådet med Bjotveit kom på banen og dermed vart det oppstart i 1979. Det som i dag er Gamleskulen var barnehage dei fyrste 25 åra. Barnehagen vart kommunal frå 1991.
18.06.2019
Kvinnherad Vekstbedrift - ny eigar av Uskedal Trelastlager.
Kvinnherad Vekstbedrift kjøper Uskedal Trelastlager. Kjøpet er formelt godkjend og overdraginga gjeld frå 1. juli. Sjøkaptein Tørris Myklebust starta den tradisjonsrike verksemda i 1929 med trelasthandel på Eikelandet. Seinare kom det nytt stort lagerbygg i Beinavikjo og byggevarehandel oppe ved riksvegen. Ny eigar legg i dag fram planar for den vidare drifta.
18.06.2019
Dyredag på Uskedal skule.
Elevrådet med kontaktlærar Hilde Bringedal arrangerte dyredag på Uskedal skule i går. Det vart lagt inn quiz med fine premiar. I det fine veret var det god stemning. Elevrådet takkar alle familiane som gjer det mogeleg å få til den årlege dyredagen.
17.06.2019
Interessann og lærerik skuledag.
Det nærmar seg slutten på det ordinære skuleåret på Eining for integrering og opplæring. Medan dei som går på såkalla introprogram må venta til juli før dei kan få sine 4 veker med sommarferie, er resten av elevane i gang med siste skuleveke si. Nokre av dei er så heldige at dei har fått feriejobb eller også fast jobb og allereie er i gang med den.
17.06.2019
SY ÆGIR frå Uskedalen på Hardanger Trebåtfestival for 5. gong.
Sigrun og Egil Ersland på SY ÆGIR er heime att frå Hardanger Trebåtfestival i helga.  Det var 5. gongen dei var med på den tradisjonelle trebåtsamlinga i Norheimesund, som i 2019 har vore skipa til i 21 år. Sigrun og Egil med Collin Archer skøyta ÆGIR vert frå arrangøren spurt om å koma til Norheimsund. Dei får ei sentral og synleg plassering i hamna like ved scenen og publikumsplassen. Påmeldinga i år var på 42 skuter.
16.06.2019
Strålande løp av Amund Hella Berge-Soldal.
Løpartalentet Amund Hella Berge-Soldal har trent godt og har hatt ei flott innleiing på friidrettssesongen.  I tillegg til å ha vist dette i lokale løp har han mellom anna imponert i Maileikane i Haugesund der han vann 1500 m.  Dette kvalifiserte han til deltaking i Tyrvingleikane som vart avvikla på Nadderud stadion i helga.  Der gjorde Amund glimrande innsats.
16.06.2019
Midtsumarskonsert i Helgheim i dag, sundag 16. juni kl. 19.

Alt er klart for Midtsumarskonsert med vokalensemblet GLIMRAH i dag i Helgheim kl. 19. Helgheim er pynta og koret er kledd i sommarkjolar og markblomar. GLIMRAH syng mellom anna folketonar og renessansemusikk. Gjester er Atle Fredheim og døtrene hans, Maia og Nanna Sofie og Fridar Malmsten Steinkopt. Les meir frå pressemeldinga:
15.06.2019
70 års dag på Steinsletto med korpsmusikk og bygdesong.
Det vart ei rettlegg triveleg stund på Steinsletto i går då den musikalske leiaren i Uskedal musikklag, Knut Steinsletten, runda 70 år. Ein ting var at korpset møtte fram og helsa jubilanten med jubilantmarsj og Boni M låt frå Salme 137. Høgdepunktet var likevel presentasjonen av bygdesongen Eikedalen, skriven av Engel Stensletten, bestemor til Knut og forøvrig fleire av gjestene i selskapet.
14.06.2019
Måsen er tilbake i reiret sitt på Neset.
Måsen er på plassen sin i same reiret som i fjor, i takstigen på Birger Myklebust sitt hus på Neset. Det er ein fiskemåse, eit par der hanen og hoa byter på å ruga på dei tre egga i reiret. Hekketida er frå 24 til 28 dagar og ungane er flygeferdige på 4 - 5 dagar. Birger snakkar med måsen kvar dag, noko som gjer at den ikkje er aggressiv.
Sponsorar
Kvinnherad Energi AS
Eidsvik Eigedom AS
Spar
Ospelunden
Gros Blomster
Stord Lufthamn
Uskedal Båtlag
Auto 88
Kvinnherad Breiband
Kvinnherad Elektro
Brødrene Hjønnevåg AS
Elins Matgleder
Uskedal Røyr og Multiservice
Solheim Turiststajson
S. Rødsten Bilforretning A/S
kvinnheringen
Kvinnherad Vekstbedrift AS
Tysnes Sparebank
grenda
Kvinnherad Renhold service
Zjakk Frisørsalong
Sparebank 1 SR bank ASA
Byggeriet
iDrift AS
Kvinnherad Breiband
Utvikla av iDrift AS